Die ontwikkelaars, die Meyer-familie, het geen koste ontsien om ’n Aftreeoord te skep waar senior burgers volkome gemoedsrus kan geniet nie. Die eienaars se siening en filosofie was van die beplanningstadium af dat daar nie eenvoudig “'n dak oor die kop’’ verskaf moet word nie maar wel ’n lewenswyse wat aan Oostvallei se senior burgers in hierdie fase van hulle lewe in die eerste plek ’n aangename verblyf met rus, vrede, gemoedsrus, gemak en veiligheid bied.

“Die klem val op ’n aangename, rustige en ’n kommerlose oudag,’’ sê Mnr Heiner Meyer en sy vrou Dr Adé Meyer. Mnr Meyer en sy pa, Mnr Heinz Meyer, was die ontwikkellaars van die weelderige woonplek terwyl Mev Anna Meyer, vir die uitleg van die prentjiesmooi tuine verantwoordelik was. Kabbelende waterstrome wat tussen die subtropiese plante kronkel, skep ’n ongelooflike rustigheid wat moeilik te versoen is met die woelige stadslewe buite die hoê veiligheidsmuur wat die kompleks omring.

Die landskapontwerp, waterstrome en damme met hul eende en veilige wandelpaaie is kundig uitgelê met net die beste gehalte plante om in die winter net so goed te vertoon soos in die somer. Inheemse bome is behou, en nuwe bome is op geskikte plekke aangeplant.

Dit is die  enigste oord wat deur die eienaars self ontwikkel is en hulle het al hul aandag daaraan bestee om daarvan 'n pragoord te maak.